Un concejal del PP, a favor de “las víctimas del franquismo”
Un conceyal del PP de Castripol pide que conste n’acta que votó a favor de la Querella Arxentina
El 11 de xunetu pasáu, el Plenu del Conceyu de Castripol aprobaba una moción de condena a la dictadura militar de Franco y d’apoyu a la Querella Arxentina que se sigue nesi país y que busca acabar cola impunidá de los crímenes cometíos pol franquismu. L’acta rexistraba los votos a favor de los conceyales socialistes y los votos en contra de los tres conceyales del Partíu Popular y del conceyal de Foru Asturies. Na sesión plenaria siguiente, el 26 de setiembre, Álvaro Queipo Somoano, ún de los tres conceyales populares, pidía que se corrixere l’acta pa que constare qu’él votare a favor de la moción d’apoyu. Polo tanto, namás les otres dos conceyales populares, Cristina López Pereira y María Isabel López García, votaron en contra.
Hai que recordar que nes otres 12 mociones aprobaes hasta agora n’Asturies, nos conceyos onde’l PP tien representación siempre votó en contra o bien abstúvose.
La Comuna d’Asturies, grupu de ciudadanos y ciudadanes que forma parte de CeAQUA (Coordinadora Estatal d’Apoyu a la Querella Arxentina) y que vien promoviendo dende hai seis meses estes mociones, considera esperanzador que s’abra una resquiebra na posición monolítica qu’hasta mostró’l Partíu Popular nos conceyos asturianos y qu’haya nes sos files persones que pongan per delantre, perriba de fidelidaes históriques malentendíes, les consideraciones democrátiques y de respetu a los derechos humanos.
El grupu asturianu de CeAQUA vien teniendo reuniones colos grupos parllamentarios de la Xunta Xeneral, la última coincidiendo cola visita a Asturies de l’abogada Ana Messuti y el querellante José María "Chato" Galante, pa que se pueda aprobar nel parllamentu asturianu un apoyu institucional a la Querella Arxentina asemeyáu al que yá s’aprobó nes cámares autonómiques de Cataluña, País Vascu o Andalucía. Esperamos que les conversaciones qu’hasta agora se tuvieron na Xunta Xeneral, tamién col Partíu Popular, lleven a que se pueda aprobar una resolución que, más allá de les posiciones ideolóxiques de caún, namás busca reparación y xusticia.
