En defensa de la llibertá y la democracia…

En defensa de la llibertá y la democracia…

Agencia Mp3*. LQS. Mayo 2021

Nun podemos dexar, y nun vamos dexar, que naide trate de retrotrayenos a los tiempos del Franquismu. Nun podemos dexar, y nun vamos dexar, más retrocesos en materia de llibertaes públiques, más recortes de derechos democráticos y más perda de bienestar social pa la mayoría social. Esiximos la derogación de la Llei Mordaza yá

Publicamos, en bable, la declaración firmada por nueve entidades memorialistas asturianas:

En defensa de la llibertá y la democracia, vacuna memorialista y republicana

Nos últimos años tamos viviendo un resurdir del pensamientu y de les acciones de la estrema derecha. Negacionismu de los crímenes del Franquismu, profanación de sitios de la memoria, exaltación de la dictadura, defensa del fusilamientu masivu d’opositores políticos y últimamente amenaces graves a dirixentes de partíos. Y lo que ye más grave, bien de veces con complicidaes más qu’evidentes de persones vinculaes a aparatos del Estáu y de dellos medios de comunicación, amás de representantes electos en parllamentos.

Pa quien conocemos bien lo que significó la nueche llarga del Franquismu, nengún d’estos fechos ye un tema menor. Porque sabemos que n’otres dómines históriques empezóse asina, y banalizando eses acciones namás se llogró que depués s’enllenare España de foses comunes, de paredones de fusilamientu y de mil y milenta persones nel exiliu. Convién alcordase de la historia pa nun la repetir.

España nun tuvo’l so “Nuremberg” y quien s’echaron franquistes y amanecieron demócrates caltuvieron incólumes les sos posiciones de poder y les sos fortunes asitiaes n’esquilmar a los perdedores de la Guerra d’España. D’aquel polvu, esti folleru. L’amnesia colectiva del campu popular, que se nos dixo que diba ser la base onde asitiar el réxime de llibertaes posterior a la muerte del dictador, en cuenta d’acabar col virus fascista, dexó-y sobrevivir, apigazáu, y agora vuelve resurdir cola compresión peligrosa inclusive de persones que nes sos families sufrieron el dolor de la represión y la violación de los derechos humanos naquella etapa ignominiosa de la nuestra historia.

Frente a eso, dende les entidaes memorialistes y republicanes que soscribimos, llevantamos la palabra de la indignación, de la rabia contenida, dende la memoria democrática, el compromisu republicanu y la llucha antifascista, pa dicir ¡NUNCA MÁS!

Nun podemos dexar, y nun vamos dexar, que naide trate de retrotrayenos a los tiempos del Franquismu. Nun podemos dexar, y nun vamos dexar, más retrocesos en materia de llibertaes públiques, más recortes de derechos democráticos y más perda de bienestar social pa la mayoría social. Esiximos la derogación de la Llei Mordaza yá.

Les entidaes que soscribimos somos una parte pequeña del movimientu popular y democráticu, pero avalen les nuestres posiciones el nuestru compromisu d’años llargos de trabayu p’acabar cola impunidá de los crímenes franquistes, que ye tamién una forma d’evitar que vuelvan producise crímenes asemeyaos. Vivimos momentos onde se ta debatiendo una Llei de Memoria Democrática a nivel del Estáu, y ye una bona oportunidá pa que seya un instrumentu normativu capaz a ayudar a educar a les nuestres xeneraciones moces en valores cívicos democráticos y que llevante una muria de contención a los intentos involucionistes de los sectores más reaccionarios de la nuestra sociedá. Precisamos una llei que respuenda a los valores de ¡VERDÁ, XUSTICIA Y REPARACION, CON GARANTÍES DE NON REPETICION!, qu’equipare en derechos a les víctimes del Franquismu, coles víctimes del terrorismu, porque nun hubo n’España organización terrorista más dañible que’l réxime de Franco.

Ye la hora de llevantar la voz, en nome de la memoria democrática y antifascista, pa nun llamentar mañana lo que nun evitemos güei. Por eso esiximos contundencia política y xudicial contra quien llancen mensaxes d’odiu racista y xenófobu, pa quien amenacen y agreden a persones por exercer los sos derechos. Esiximos “cordón sanitariu” real a quien quieren, banalizando’l Franquismu, volvenos a un pasáu que nun tenemos que repetir. Esiximos afondar na democracia, nes llibertaes reales, porque namás con más democracia y más llibertá, con más igualdá y más xusticia social, vamos poder construir nun mundu fraternu, que ye’l que precisamente odien quien agora intenten facenos creyer que na llucha del últimu contra’l penúltimu ta la nuestra salvación.

* FEDERACIÓNN ASTURIANA MEMORIA Y REPUBLICA (FAMYR), LA COMUNA D’ASTURIES – REDE CEAQUA, ATENEU OBRERU DE XIXÓN, ATENEO REPUBLICANO DE ASTURIAS, ASOCIACIÓN REPUBLICANA CABO PEÑAS “CRISTINO GARCÍA”, ESTAYA DE LA MEMORIA L’ALTU NALÓN, PLATAFORMA CONTRA LOS RECORTES DE AVILÉS Y COMARCA, FORO POZU FORTUNA, SOCIEDAD CULTURAL GIJONESA.

Síguenos en redes sociales… Facebook: LoQueSomos Twitter: @LQSomos Telegram: LoQueSomosWeb Instagram: LoQueSomos

LQSomos

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.

Nos obligan a molestarte con las "galletitas informáticas". Si continuas utilizando este sitio aceptas el uso de cookies. más información

Los ajustes de cookies de esta web están configurados para "permitir cookies" y así ofrecerte la mejor experiencia de navegación posible. Si sigues utilizando esta web sin cambiar tus ajustes de cookies o haces clic en "Aceptar" estarás dando tu consentimiento a esto.

Cerrar