Miles de presones escontra les xubíes eléctriques
Una manifestación a la escontra’l tarifazo eléctricu, convocada por para@s y precari@s d’asturies.
Sol lema “La xubida de la lluz ye una estafa”, miles de presones se manifestaron en Xixón a la escontra'l tarifazu eléctricu, a convocatoria de Para@s y Precari@s d’Asturies.
Dende'l primer intre, decenes d'antorches dieron el calor que'l monopoliu eléctricu y los sos Gobiernos cómplices, y-niéguen al pueblu. Como dicíen munchos y munches manifestantes: “Si nun podemos pagar la eletricidá, vamos allumar les cais con fueu”.
Para@s y Precari@s d’Asturies reivindicaron el serviciu eléctricu como un drechu tan básicu como la sanidá o la educación, que tendríe de tar garantizáu pol Estáu, desixendo una drástica rebaxa de la tarifa eléctrica y el serviciu eléctricu de baldre pa les presones y families ensin recursos económicos.
Y nun duldaron n’afitar que “los Gobiernos y les Eléctriques quieren facenos tornar a les cavernes; nun son más qu’unos criminales y unos asesinos”, en referencia al pelligru pa la vida de miles de persones, que, ensin perres pa pagar la calefacción, acaben finando pol agravamientu inreparable de les sos amalaúres (pulmoníes, neumoníes, etc), demientres que los beneficios de les empreses eléctriques siguen siendo multimillonarios.
Con un glayíu de ¡Puxa la llucha de la clas obrera!, ¡Puxa Asturies!, dióse por rematada la movilización.
Dende ¡Asturies en Pie! y dende la CSI, felicitamos a Para@s y Precari@s d’Asturies pol ésitu de la so convocatoria y afalagámoslos a siguir lluchando polos derechos populares y de la clas obrera.
