L’abogáu Jacinto Lara presenta n’Uviéu’l llibru “Memorias democráticas”
Por Agencia Mp3*. LQSomos.
L’asociación La Comuna d’Asturies, integrante de la Coordinadora Estatal d’Apoyu a la Querella Arxentina (CEAQUA), presenta esti vienres 27 de xineru la obra colectiva “Memorias democráticas”. Jacinto Lara Bonilla, abogáu de la CEAQUA y coordinador del llibru con Miguel Urbán, va encargase de la presentación de la obra. L’actu, d’entrada llibre, va facese a les 19 hores, nel salón d’actos del Cibercentru La Lila (c/ La Lila, 17, Uviéu).
El llibru trata dende enfoques variaos la memoria democrática: amás de los coordinadores, escriben tamién Sabino Cuadra, Rosa García, Enrique Gómez, Soledad Luque, Llum Quiñonero, Jaime Pastor, Jesús Rodríguez y Luis Suárez. Entiéndese la memoria democrática como un arma contra la impunidá y l’amnesia exercíes por un poder qu’a lo llargo de más de cuarenta años negó l’accesu a la xusticia a les persones que sufrieron violaciones graves de derechos humanos na etapa de la dictadura. Esta anomalía fai posible qu’España siga siendo güei ún de los países con más casos de desapaición forciada del mundu. Y un Estáu que tien una parte fundamental de la so memoria democrática enterrada nes cunetes y foses comunes tien un problema perseriu col pasáu, pero sobre manera col presente. Na obra búscase conectar les lluches del pasáu colos conflictos del presente buscando la xusticia, la verdá y la reparación, too ello entrellaciao cola reclamación popular de “democracia real yá”. La memoria democrática nun quier volver abrir firíes, sinón poder zarrales afondando nos principios más elementales de cualquier Estáu democráticu. Por eso ye tan importante, tan urxente y tan actual.
Jacinto Lara Bonilla foi presidente de l’Asociación Pro Derechos Humanos d’España. Actualmente ye abogáu de la CEAQUA y asiste a víctimes de la dictadura franquista nel exerciciu d’acciones énte los Tribunales.
Síguenos en redes sociales… Mastodon: @LQSomos@nobigtech.es Diaspora*: lqsomos@wk3.org Telegram: LoQueSomosWeb Twitter: @LQSomos Facebook: LoQueSomos Instagram: LoQueSomos
