N’Asturianu: Amorín
Por Dolfo Camilo Díaz*. LQSomos.
Cuando apaez una segunda edición d´un poemariu paez que l´universu va pela sebe y pela sombra; paez que too encartia pa dir bien… Y eso ye lo que siento cuando esfueyo ´l llibriquín qu´acaba cayer nes mios manes: “Segunda crónica en Verso” de Francisco Javier Rodríguez Amorín (El Garaje Ediciones S.L.; Madrid 2021, n´escelente edición edición de lletra y orixinal tamañu que perfai un poemariu pa llevar en bolsu).
Abro la obra y carícienme unos versos que, por momentos, puen a la contra ´l frío: “Alegría/La sonrisa me manifiesta, en pública gratificación”… Percuerro les fueyines, otros versos que fabriquen un sonetu sáltenme a los güeyos: “Grandes poetas que nos mienten/humanos, enojo y de buen corazón…” Sí, definitivamente l´Universu paez armónicu nesta nueche de xineru… ¡hasta que llega ´l tontu de guardia… y lo jode! Güei, el tontu de guardia (más bien un tontu eméritu, un tontu honorariu pa tola vida) ye, cómo non, Toni Cantó. Nun voi afondar más néllo y que perdone´l lletor por escachar l´armonía l´universu mentando al rei de los fatos, al emperador de la idiocia… Pero yera menester contraponer la intelixencia y la sensibilidá del autor de la “Segunda crónica” cola estulticia d´un arrimáu como Cantó. Tampoco ayuden los retrasos nel AVE (¡trenta años de retrasos! Pa flipar… Lo raro ye que nun mos llevantemos n´armes a la contra la ensin razón política y los lobbies que correspuendan) pa que l´universu siga armónicu y los versos sean medicina pal alma.
Métome notru poema: “Las palabras escapan de una boca sin dedos” Son palabres faciendo malabares… “Especial este revoltijo de palabras…” L´autor, por momentos, fai sicografíes: testos d´escritura automática, los fonemes navegando peles terminaciones nervioses, buscando cuerpos onde formar sílabes y soníos… Escelente l´entamu d´Iñaki Alrui, qu´abri´l llibru, guiando al lletor ensin pontificar, compartiendo intelixentes reflexones.
Amorín ye parte del paisaxe de la Comarca d´Avilés: conocémonos cuantayá y, posiblemente, conocíemonos enantes de conocemos. Ye una referencia na llucha sindical, nos compromisos cívicos, d´esa progresía que tanto aborrez el tontu de guardia Cantó, pero que tien llograo dalgo tan básico pa la humanidá como ye la “evolución” (l´alfabetización, la sanidá…) Los 21 poemes qu´ufre Amorín merecen la pena: son un besín a la medianueche, un trallazu pal alma… Un paliativu pa la contra los tontos de guardia. Recomendable.
* Publicáu en El Comercio. “LES LLUVIES DE CASTAMERE”
– Segunda crónica en verso. Francisco Javier Rodríguez Amorín.
El Garaje Ediciones. Colección Poesía. 64 páginas. Formato: 16,5 x 12 cms.
ISBN: 978-84-124123-3-8. Precio: 10 euros. info@elgarajeediciones.com
Síguenos en redes sociales… Diaspora: lqsomos@wk3.org Facebook: LoQueSomos Twitter: @LQSomos Telegram: LoQueSomosWeb Instagram: LoQueSomos
